आढावा बैठकित प्रशासनाकडून अनुकूल दिशा
संकेत पाटील /तासगाव
सांगली जिल्ह्यातील तासगाव एम.आय.डी.सी. औद्योगिक क्षेत्राच्या विकासासंदर्भात मुंबई येथे २७ मे २०२६ रोजी आढावा बैठक पार पडली. ही बैठक महाराष्ट्र शासनाचे मा. प्रधान सचिव (उद्योग) यांच्या अध्यक्षतेखाली झाली असून, महाराष्ट्र औद्योगिक विकास महामंडळाचे मुख्य कार्यकारी अधिकारी या बैठकीस उपस्थित होते.
तासगावचे विधानसभा सदस्य मा. रोहित सुमन आर.आर. पाटील यांनी प्रधान सचिव (उद्योग) व एम.आय.डी.सी. मुख्य कार्यकारी अधिकारी यांच्यासमोर प्रत्यक्ष सादरीकरण करत, तासगाव औद्योगिक क्षेत्राची सद्यःस्थिती व गुंतवणूकविषयक मांडणी सविस्तरपणे सादर केली.
या बैठकीत काही नामांकित कंपन्यांना आम्ही दिलेल्या प्रेझेंटेशन बाबत माहिती दिली आणि त्याअनुषंगाने तासगाव औद्योगिक क्षेत्राच्या पुढील वाटचालीसंदर्भात ठोस व कृतीशील दिशा निश्चित करण्यात आली. मा. प्रधान सचिव (उद्योग) यांनी संबंधित विभागांना या अनुषंगाने पुढील कार्यवाही करण्याबाबत सूचित केले
योगेवाडी व मणेराजुरी झोनमधील पायाभूत सुविधा कामे, भूसंपादनविषयक प्रक्रियेस गती, भूखंड दराची अधिसूचना, तसेच देशी व आंतरराष्ट्रीय गुंतवणूकदारांसमोर क्षेत्राची मांडणी या विषयांवर बैठकीत सविस्तर चर्चा झाली. प्रशासनाने या प्रस्तावांचे सकारात्मक स्वागत करत, उपस्थित विषयांवर अनुकूल दिशा सूचित केली.
परिसरातील विद्यमान कृषी-आधारित अर्थव्यवस्था व पर्यावरण यांचे जतन करत औद्योगिक विकास साधण्याच्या भूमिकेसही बैठकीत मान्यता देण्यात आली; शाश्वत विकास हे या उपक्रमाचे घोषित उद्दिष्ट आहे. राष्ट्रीय पर्यावरण अभियांत्रिकी संशोधन संस्थेमार्फत (NEERI) होणाऱ्या पर्यावरणीय अभ्यासाद्वारे क्षेत्रात अनुमत उद्योगांची निश्चिती केली जाईल.
बैठकीसाठी करण्यात आलेली सुसंगत तयारी व सादर मांडणीची प्रशासनाकडून नोंद घेण्यात आली. “तासगाव शाइन्स” या संकल्पनेअंतर्गत — लोकांची एम.आय.डी.सी. — पुढे नेल्या जाणाऱ्या या उपक्रमाचे उद्दिष्ट, मंजूर शासकीय पायाभूत सुविधांचे रूपांतर तासगाव तालुक्यातील स्थानिक रोजगार व औद्योगिक हालचालींमध्ये करणे, हे आहे.
प्रतिक्रिया व्यक्त करा